Eldfimt stuð og blæðandi hjörtu

Það verður ekki auðvelt að raða saman lýsingarorðum til þess að gefa mynd af tónleikunum í gærkvöldi, sem voru 5 ára afmælishátíð Blúshátíðar í Reykjavík.  Þar komu fram allir heiðursfélagar Blúsfélags Reykjavíkur, nema Magnús Eiríksson, sem átti ekki heimangengt. Þetta fór allt mjög mildilega af stað, og Tena Palmer og Gras kveiktu neistana með ilmandi blágresi sem gerist ekki betra hér á landi.  Með henni í bandinu voru Jón Skuggi á bassa, KK og Gummi P á gítar og Maggi Einars á mandólín.  Bergþór Smári tróð næst upp með Moodinu sínu.  KK og KK bandið  - ja, hvað getur maður sagt?  er ekki Sesar búinn að nota orðin "komu, sáu og sigruðu"- þeir sigruðu hjörtu salarins med det samme, og keyrðu allt upp og í botn.  Þorleifur á bassann, Björgvin Gíslason á gítar.  Dóri Perkins, - eða var það Pinetop Bragason á hammondinn.  Sá hélt reyndar á köflum að hann væri í hljómsveitinni Uriah Heep.  Gaman að sjá Mr. Blues í þessu hlutverki.  Þetta eru magnaðir blúsarar.  Það varð ekkert lát á þessu fjöri.  Andrea var gyðja kvöldsins, flott, sjóðandi heit og söng með blæðandi blúshjarta - guð minn góður...  maður þorir varla að anda.....  og svo engin pylsuendarúsína, heldur vinkona blúsbloggsins Deitra Farr og Vinir Dóra.  Þetta var sprengja, algjör sprengja, ekki hægt að sitja kyrr ekki hægt að fara ekki inn í grúvið - klappa með, dilla sér, syngja, gleðjast, - blúsálfarnir í salnum umturnuðust.  Það er eitthvað magnað í gangi milli Dóra og Deitru - Dóri var í svakalegu stuði og reif frá sér sólóin hvert af öðru, sóló bæði á gítarinn gamla Rauð og þann nýja Múhameð. Deitra hefur aldrei verið betri á íslensku sviði.  Davíð Þór á hammondinn fór algjörlega á kostum - í tali og tónum, Gummi P líka - bara í tónum.  Þessir tvíburasynir Karls Sighvatssonar eru snillingar.    Geiri á trommur og Jón artisti Ólafsson á bassann - þetta kraumaði allt af góðum fíling.  Sjóið endaði með því að allir listamenn kvöldsins komu á sviðið og tóku Let the Good Times Roll sem var fyrst flutt 1917 í New Orleans .  Jamen.   Klassart var rétt að ljúka sínum leik á Rúbín þegar blúsbloggið mætti á staðinn. Ester og Rætur tóku við og spiluðu þar til helgi föstudagsins langa opinberaðist í því að ljósin voru kveikt og barnum lokað.

 

 Dóri kynnir fyrsta atriði kvöldsins, Tenu Palmer og Gras

KK bandið

The organist.

Deitra Farr.  Flott.  Framdi seið með Dóra.

Hver sagði að lífið væri auðvelt?

Langflottastar

Yardbirds - gáfu ekkert eftir

Ég held að það hafi komið mörgum á óvart hvílíkt þrusuband The Yardbirds eru.  Chris Dreja eins og klettur á vængnum og ungu mennirnir tveir gítarleikarinn Ben King, og bassaleikarinn John Idan hreint ótrúlega flinkir og staðfastir blúsrokkarar.  Jim McCarty er enn flottur trommuleikari og munnhörpumaðurinn Alan Glen var líka fínn. Sjóið í gærkvöldi byrjaði reyndar með Nordic All Star's Blues Band, og það verður að segjast eins og er að þessi fyrsta opinbera birtingarmynd grúppunnar var mjög skemmtileg.  Sérstaklega var gaman að hafa Pétur Östlund á settinu - hann er göldróttur bókstaflega.

  

Hér á myndinni eru Bjöggi Gísla og KK í miklum ham.  Pétur lét bera annað sett inn á sviðið  - Sonor sett, í næsta atriði þar sem hann spilaði einnig - það voru Bláir skuggar.  Jón Páll Bjarnason, Þórir Baldursson, Pétur og Siggi Flosa.  Þeir voru pottþéttir og bláa djassgrúvið þeirra iðandi.  Þessir herramenn eru töffarar af guðs náð og spila eftir því.  En svo komu Yardbirds og byrjuðu með trukki, - tóku bæði gamla standarda og fleira.  Það var gaman að heyra I ain't got you, - rífandi dúndurstemmning í salnum.  Þeir geta varla fengið betri sal en var á Nordica í gærkvöldi.  I´m a Man - blúsbloggari varð unglingur í annað sinn.   Ég held að flestum hafi þótt flottast að heyra Dazed and confused með þessari sögufrægu eðalsveit.  Jú, lagið er vissulega eftir Jimmy Page og þekkast með Led Zeppelin, en hann samdi það meðan hanan var enn í Yardbirds, og þeir frumfluttu það og spiluðu, áður en hann hætti í bandinu.  Frábært!!!   Ungliðarnir á Rúbín voru í banastuði, - það var einmitt ágætt á eftir Yardbirds að fá Cream lög.  Miðaldra unglingar fóru á dansgólfið og það var gaman.

Rómantískur Magic Slim

Frábærir tónleikar í gærkvöldi.  Margrét Guðrúnardóttir byrjaði með Bandinu hans pabba og var fruntagóð.  Nojararnir Jolly Jumper og Big Moe léku svo listir sínar þar til Teardrops stigu á svið.  Jon McDonald gítarleikari frontaði bandið meðan beðið var eftir stóra manninum á sviðið.  Chicago grúvið lét ekki bíða eftir sér; þéttur rytmi og gítarleikur sem potar í hjartað.  Magic Slim kom svo á sviðið og tók salinn strax.   Þar kom blúsinn frá hjartanu.  Mögnuð upplifun.  Flest allt blúsar um ástina, svikin og örvæntinguna.  If you're gonna love somebody, please let it be me -  ótrúlega fallegt í meðförum hans þetta lag kom út á disk með Vinum Dóra 1993.   Í lok tónleikanna þegar meistarinn var farinn af sviðinu kallaði Dóri Braga Jon McDonald aftur upp á svið og hann tók Me and the Devil Blues eftir Robert Johnson, - búinn að gera textann aðeins kurteislegri en Robert Johnson ætlaðist til.  Þá var ekki um annað að ræða en að hóa í dívuna sem sat útí sal - Deitru Farr, og hún kom upp á svið til Dóra, þá gat sá gamli auðvitað ekki látið sitt eftir liggja og þau náðu fullkomlega saman á sviðinu Deitra og Magic Slim.

Á Rúbín spiluðu ungliðaböndin,  Ferlegheit frá Akranesi og svo Blúsþrjótarnir.  Þá kom Ragnheiður Gröndal og söng með Gumma P.  Teardrops komu svo á svið, og það var geggjað að heyra Dóra Braga taka aftur með þeim If you're gonna love somebody.  Eins og hann hefði alltaf verið í bandinu. Ungu mennirnir hikuðu ekkert við að fara á sviðið aftur og sýna hvað í þeim býr, og þeir voru flottir.

Hér koma myndir frá kvöldinu.  Myndirnar frá Nordica eru eftir Júlíus Valsson, hinar eru eftir blúsbloggara.

 

Dóri upplýsir að Ásgeir Óskarsson hljóti heiðursviðurkenninguna.

Vinir Geira og kollegar báru inn Gretch trommusettið sem fylgdi viðurkenningunni. Settið er flott, perluhvítt.  Pétur Östlund var í hópi trommuberanna og hér þakkar Geiri honum fyrir sig.

Margrét Guðrúnardóttir og Bandið hans pabba.

Jolly Jumper og Big Moe

Jon McDonald og meistarinn

Magic Slim and the Teardrops

Dóri nokkur Bragason kallaður til leiks

Þau gerast ekki fegurri blúsmannabrosin.  Bros sem bræða.

Og þessir eru líka sætir.  Los Guitarissimos.

Blúsþrjótarnir á Rúbín

Ragnheiður Gröndal, Gummi P. Tveir dropar og Dóri

Dóri og Droparnir á Rúbín.  Dóri fór létt með að fronta þetta band Chicago Style.

 

Ásgeir Óskarsson hreppti hnossið

Ásgeir Óskarsson trommuleikari hefur verið valinn heiðursfélagi Blúsfélags Reykjavíkur í ár.  Þetta var tilkynnt við opnun Blúshátíðar í Reykjavík á Hilton Reykjavík Nordica kl. 17 í dag.  Með viðurkenningunni frá Blúsfélaginu fylgdi forláta Gretch trommusett af bestu gerð í þakklætisvott fyrir framlag til blústónlistarinnar. Ásgeir er einn virtasti trommari á Íslandi og hefur hann spilað með flestum stærstu hljómsveitum og tónlistarmönnum Íslands. Svo aðeins fáeinar af hljómsveitunum sem hann hefur spilað með séu nefndar má nefna Eik, Paradís, Póker, Pelican, Stuðmenn, Vini Dóra og Riot.  Hann hefur verið óhemju liðtækur í íslensku tónlistarlífi og leikið inn á fleiri hljómplötur, og með fleiri listamönnum, en tölu verður á komið. Plöturnar eru að því er næst verður komist orðnar rúmlega 300.  Ásgeir er þó ekki síst góður lagasmiður sjálfur og hefur gefið út 3 plötur með eigin tónlist, Veröld smá og stór, Áfram og Sól.   Þeir listamenn sem áður hafa hreppt þessa heiðursnafnbót eru Magnús Eiríksson 2004, Björgvin Gíslason 2005, Andrea Gylfadóttir 2006, KK 2007.

Blóðveiðandiblúsþyrstur hammondleikari

Hammondmaðurinn Davíð Þór Jónsson er búinn að læra lagalistann sinn fyrir tónleika á fimmtudagskvöldið, eins og fram kemur í ástríkur bréfi hans til Dóra:

 

"....verð blóðveiðandiblúsþyrstur og

skal spila úr mér hjartað

mæti í geðveikum gír

og meðetta á hreinu

ást."

 

Miðasala!

Það er enn hægt að kaupa miða á midi.is  en við minnum líka á að miðar verða seldir við innganginn frá kl. 19 fyrir tónleika.

Reykýsusúpa..... hmmm

Djö..... hljómar það vel!

 

Klassakrakkar í Klassart

Fríða og Hlynur í Klassart voru í Morgunþætti Rásar 2 í morgun hjá Hrafnhildi og Gesti.  Þau sögðu frá Blúshátíð og frá nýju plötunni sinni sem er að koma út.  Og Klassart lofaði að koma á óvart á hátíðinni og með látum.  Eins og allir vita sigraði Klassart í blússamkeppni Blúshátíðar og Rásar tvö fyrir tveimur árum.  Klassart spilar í Klúbbi blúshátíðar á Rúbín á fimmtudagskvöldið.

Klassart á Blúshátíð í fyrra.

Gleðilega hátíð!

Blúshátíð í Reykjavík hefst í dag!

Opnunarhátíðin verður kl. 17 á Hilton Reykjavík Nordica, þar sem Blúsfélag Reykjavíkur heiðrar blúsmann.  Handhafar Blúsmiðans eru velkomnir á þessa stuttu en skemmtilegu athöfn, þar sem stemmningin verður keyrð upp fyrir hátíðina framundan.  Stelpan frábæra, sem blúsbloggið hleraði hjá Sævari Karli á laugardaginn - Margrét Guðrúnardóttir spilar við þetta tækifæri með Bandinu hans pabba.  Hún er efni í blúsmann.  Sá sem verður fyrir valinu, verður leystur út með veglegum tónlistargjöfum sem koma sér vel í blúsmennskunni.

HVER VERÐUR VALINN?

Og svo er það Magic Slim í kvöld.  Hann kom í gær - það var ekki mikið mál að fá hann í viðtal fyrir Ísland í dag.  Var hann flottur eða hvað?  Það verður súrrandi fjör alla vikuna, - Davíð Þór Jónsson ætlar alla vega að spila úr sér hjartað.  Yardbirds eru að lenda, sömuleiðis Deitra Farr og hennar heittelskaði Krister Palais.

Meiri fréttir á blúsblogginu - ekki gleyma að tékka inn hér af og til.

Blúshátíð í efsta sæti

Blúshátíð er í efsta sæti á sölulista Miði.is  Miðarnir rjúka líka út  - hver vill svosem missa af svona hátíð?  Ekki ég.